अमेरिकेचे परराष्ट्र सचिव Marco Rubio यांच्या भारत दौऱ्यात नवी दिल्लीतील संयुक्त पत्रकार परिषदेत भारतीयांविरोधात अमेरिकेत वाढत असलेल्या (Racism) वंशविद्वेषाच्या मुद्द्यावर थेट प्रश्न विचारण्यात आला. पत्रकार Sidhant Sibal यांनी विचारलेल्या या प्रश्नामुळे काही क्षणांसाठी रुबिओ स्पष्टपणे अस्वस्थ झाल्याचे दिसून आले. सोशल मीडियावर या संवादाचा व्हिडिओ मोठ्या प्रमाणात व्हायरल होत असून भारत-अमेरिका संबंधांमध्ये भारतीय समुदायाच्या सुरक्षिततेचा मुद्दा पुन्हा चर्चेत आला आहे. नवी दिल्लीमध्ये भारताचे परराष्ट्र मंत्री S. Jaishankar आणि रुबिओ यांची संयुक्त पत्रकार परिषद सुरू असताना पत्रकार सिधांत सिबल यांनी अमेरिकेत भारतीय आणि भारतीय वंशाच्या लोकांविरोधात वाढत्या वर्णद्वेषी टिप्पण्या आणि द्वेषपूर्ण वातावरणाबाबत प्रश्न उपस्थित केला. त्यावर उत्तर देताना रुबिओ म्हणाले की, “प्रत्येक देशात मूर्ख लोक असतात. अमेरिकेतही काही लोक मूर्खपणाच्या टिप्पणी करतात.” त्यानंतर त्यांनी अमेरिका ही स्थलांतरितांना स्वीकारणारी आणि त्यांच्यामुळे समृद्ध झालेली राष्ट्रव्यवस्था असल्याचे सांगितले. या प्रश्नाचे उत्तर देताना रुबिओ सुरुवातीला काही क्षण थांबले आणि “कोण म्हणाले?” अशी प्रतिक्रिया दिल्याचेही समोर आले आहे. पत्रकार परिषदेत त्यांच्या चेहऱ्यावर संभ्रम आणि अस्वस्थता दिसून आल्याची चर्चा अनेक माध्यमांमध्ये झाली. सोशल मीडिया प्लॅटफॉर्मवर पत्रकार सिधांत सिबल यांनी स्वतः या प्रसंगाचा व्हिडिओ शेअर केला असून तो मोठ्या प्रमाणात चर्चेत आहे. अमेरिकेत अलीकडच्या काळात भारतीय आणि भारतीय-अमेरिकन समुदायावर सोशल मीडियामधून वांशिक टीका, स्थलांतरविरोधी वक्तव्ये आणि H-1B व्हिसा धारकांबाबत नकारात्मक प्रचार वाढल्याची भावना भारतीय समुदायात आहे. विशेषतः अमेरिकेतील निवडणूक वातावरण, स्थलांतर धोरणांवरील वाद आणि आर्थिक स्पर्धेमुळे भारतीय व्यावसायिकांबाबत काही अतिरेकी मतप्रवाह सोशल मीडियावर दिसून येत आहेत. या पार्श्वभूमीवर विचारलेला प्रश्न राजनैतिकदृष्ट्या संवेदनशील मानला जात आहे.
Racism व्यतिरिक्त अन्य विषयावर बोलताना अमेरिकेचे परराष्ट्र सचिव Marco Rubio म्हणाले
रुबिओ यांनी पत्रकार परिषदेत अमेरिकेच्या स्थलांतर धोरणातील बदल हे भारतविरोधी नसून जागतिक पातळीवरील सुधारणांचा भाग असल्याचेही स्पष्ट केले. त्यांनी भारतीय उद्योग आणि भारतीय व्यावसायिकांनी अमेरिकन अर्थव्यवस्थेला मोठे योगदान दिल्याचे नमूद केले. भारतीय कंपन्यांनी अमेरिकेत अब्जावधी डॉलरची गुंतवणूक केल्याचे सांगत दोन्ही देशांतील आर्थिक भागीदारी आणखी मजबूत करण्याची इच्छा व्यक्त केली.
दरम्यान, या पत्रकार परिषदेत व्यापार, तंत्रज्ञान, ऊर्जा सहकार्य, मध्यपूर्वेतील परिस्थिती, समुद्री सुरक्षा आणि इंडो-पॅसिफिकमधील धोरणात्मक भागीदारी यांसारख्या महत्त्वाच्या विषयांवरही चर्चा झाली. रुबिओ यांनी भारताला अमेरिकेचा अत्यंत महत्त्वाचा रणनीतिक भागीदार म्हटले, तर भारतानेही बहुपक्षीय सहकार्यावर भर दिला.
सोशल मीडियावर मात्र रुबिओ यांच्या Racism बाबत दिलेल्या उत्तरावर संमिश्र प्रतिक्रिया उमटताना दिसत आहेत. काहींनी त्यांच्या वक्तव्याला वास्तववादी प्रतिक्रिया म्हटले, तर अनेकांनी अमेरिकेतील वाढत्या भारतीयविरोधी भावना फक्त “मूर्ख लोकांच्या टिप्पणी” म्हणून नाकारता येणार नाहीत, असे मत व्यक्त केले आहे. भारतीय समुदायाच्या सुरक्षेबाबत अधिक ठोस भूमिका अपेक्षित असल्याची मागणीही होत आहे.
समाज माध्यमावरील प्रतिक्रियेसाठी येथे क्लिक करा.
आमचे अन्य ब्लॉगपोस्ट :
