भारताच्या सुरक्षाव्यवस्थेला हादरा देणाऱ्या एका मोठ्या हेरगिरी प्रकरणात राष्ट्रीय तपास संस्था National Investigation Agency अर्थात NIA ने कोलकात्यातील झफर रियाझ उर्फ रिजवी याला अटक केली आहे. पाकिस्तान समर्थित या हेरावर भारतातील गोपनीय आणि संवेदनशील सुरक्षा माहिती पाकिस्तानच्या गुप्तचर अधिकाऱ्यांना (PIOs) गुप्तपणे पुरवल्याचा गंभीर आरोप आहे. एन.आय.ए. च्या माहितीनुसार, हा संपूर्ण प्रकार भारतविरोधी दहशतवादी कटाचा भाग असल्याचे उघड झाले आहे. तपास यंत्रणेनुसार, झफर रियाझ याच्याविरोधात यापूर्वीही हेरगिरीच्या प्रकरणात कारवाई झाली होती. तो 2005 पासून वारंवार भारत आणि पाकिस्तानदरम्यान प्रवास करत होता. या प्रवासादरम्यान त्याचा संपर्क पाकिस्तान इंटेलिजन्स ऑफिसर्सशी आला आणि त्याला पैशांचे आमिष तसेच पाकिस्तानी नागरिकत्वाचे आश्वासन देऊन भारतात हेरगिरी करण्यासाठी तयार करण्यात आले.
NIA च्या तपासात धक्कादायक माहिती समोर
NIA च्या तपासात धक्कादायक माहिती समोर आली असून आरोपीने भारतीय मोबाईल क्रमांकांचे OTP पाकिस्तानातील अधिकाऱ्यांना पुरवले होते. या OTP च्या मदतीने WhatsApp खाती सक्रिय करण्यात आली आणि त्याद्वारे भारतातील इतर संशयित एजंटांशी गुप्त संपर्क साधला जात होता. या प्रकरणात मोतीराम जाट नावाच्या आणखी एका आरोपीशीही संपर्क असल्याचे उघड झाले आहे. तोदेखील संवेदनशील सुरक्षा माहिती पाकिस्तानपर्यंत पोहोचवत असल्याचा आरोप आहे.
NIA ने झफर रियाझविरोधात कायदेशीर कार्यवाही
एन.आय.ए. ने झफर रियाझविरोधात भारतीय न्याय संहिता (BNS), अधिकृत गोपनीयता कायदा (Official Secrets Act) आणि बेकायदेशीर कारवाया प्रतिबंधक कायदा (UAPA) अंतर्गत गुन्हे दाखल केले आहेत. त्याच्याविरोधात Look Out Circular जारी करण्यात आले होते तसेच त्याला ‘प्रोक्लेम्ड ऑफेंडर’ घोषित करण्याची प्रक्रिया सुरू होती. अखेर NIA ने त्याला अटक करून मोठ्या हेरगिरी रॅकेटचा पर्दाफाश केला आहे.
या प्रकरणामुळे देशातील सुरक्षा यंत्रणा अधिक सतर्क झाल्या असून पाकिस्तानकडून सोशल मीडिया, डिजिटल प्लॅटफॉर्म आणि संवाद अॅप्सच्या माध्यमातून भारतात गुप्त कारवाया सुरू असल्याची भीती व्यक्त केली जात आहे. NIA आता या नेटवर्कमधील इतर सहभागी, आर्थिक व्यवहार आणि दहशतवादी कटाचे व्यापक संबंध शोधत आहे.
समाज माध्यमावरील प्रतिक्रियेसाठी येथे क्लिक करा.
आमचे अन्य ब्लॉगपोस्ट :
