ग्लासगो | Commonwealth Games 2026 प्रतिनिधी : भारतीय वेटलिफ्टिंगची ‘गोल्डन गर्ल’ मीराबाई चानू हिने पुन्हा एकदा आपल्या अप्रतिम कामगिरीने संपूर्ण देशाला अभिमान वाटावा अशी कामगिरी करत ग्लासगो येथे सुरू असलेल्या कॉमनवेल्थ गेम्स 2026 मध्ये महिला 48 किलो वजनी गटात सुवर्णपदक जिंकले आहे. या विजयासह तिने सलग तिसऱ्यांदा कॉमनवेल्थ गेम्समध्ये सुवर्णपदक जिंकण्याचा ऐतिहासिक पराक्रम केला. हा भारताचा स्पर्धेतील पहिला सुवर्णपदक ठरला. मीराबाई चानूने यापूर्वीही कॉमनवेल्थ गेम्समध्ये सुवर्णपदके जिंकली होती. आता 2026 मधील विजयासह तिच्या नावावर सलग तीन सुवर्णपदकांची हॅट्ट्रिक झाली आहे. तसेच कॉमनवेल्थ गेम्समधील हे तिचे एकूण चौथे पदक असून भारतीय वेटलिफ्टिंगच्या इतिहासातील ही एक मोठी उपलब्धी मानली जात आहे. पंतप्रधान नरेंद्र मोदी यांनी सोशल मीडिया प्लॅटफॉर्म ‘एक्स’वरून मीराबाई चानूचे अभिनंदन केले. त्यांनी म्हटले की, “भारतीय वेटलिफ्टिंगच्या इतिहासात आणखी एक गौरवशाली अध्याय लिहिला गेला आहे. मीराबाई चानूने 48 किलो गटात शानदार कामगिरी करत सुवर्णपदक जिंकले. सलग कॉमनवेल्थ गेम्स सुवर्णपदके आणि एकूण चौथे कॉमनवेल्थ पदक जिंकून ती प्रत्येक भारतीयासाठी प्रेरणास्थान बनली आहे.” पंतप्रधानांनी तिच्या भावी वाटचालीसाठीही शुभेच्छा दिल्या.
Commonwealth Games 2026 मध्ये सुवर्णपदक जिंकल्यानंतर मीराबाई चानूची भावनिक प्रतिक्रिया
स्कॉटलंडमधील ग्लासगो येथे राष्ट्रकुल क्रीडा स्पर्धेत (Commonwealth Games 2026) महिला 48 किलो वजनी गटात सुवर्णपदक जिंकल्यानंतर भारताची स्टार वेटलिफ्टर मीराबाई चानू हिने आपल्या भावना व्यक्त करताना हा विजय अत्यंत खास असल्याचे सांगितले. ती म्हणाली, “भारतासाठी सलग तिसरे सुवर्णपदक जिंकता आल्याचा मला खूप आनंद आहे. स्पर्धेपूर्वी माझ्या मनात अनेक विचार सुरू होते. मी सुवर्णपदक जिंकू शकेन का, याबाबतही मनात शंका होती. माझ्यावर दबाव होता आणि आपल्या संपूर्ण भारतीय वेटलिफ्टिंग संघाने उत्कृष्ट कामगिरी करावी, ही जबाबदारीही सतत जाणवत होती. मात्र अखेर तिसरे सलग सुवर्णपदक आणि राष्ट्रकुल स्पर्धेतील एकूण चौथे पदक जिंकल्याचा मला खूप आनंद आहे.” मीराबाईच्या या वक्तव्यातून तिच्यावर असलेला मानसिक ताण, देशासाठी सर्वोत्तम कामगिरी करण्याची जिद्द आणि विजयाचा आनंद स्पष्टपणे दिसून येतो.
Commonwealth Games 2026 : मीराबाई चानू यांनी विक्रमी कामगिरीने प्रतिस्पर्ध्यांना मागे टाकले
स्पर्धेदरम्यान मीराबाई चानूने सुरुवातीपासूनच वर्चस्व राखले. तिने स्नॅचमध्ये 85 किलो वजन उचलून स्पर्धेचा नवा विक्रम प्रस्थापित केला. त्यानंतर क्लीन अँड जर्कमध्ये 105 किलो वजन सहज उचलत आणखी एक गेम्स विक्रम आपल्या नावावर केला. अशा प्रकारे 190 किलो एकूण वजन उचलून तिने सुवर्णपदक निश्चित केले आणि स्वतःचे वर्चस्व पुन्हा सिद्ध केले.
वजन राखण्यासाठी मोठा त्याग
सुवर्णपदकानंतर बोलताना मीराबाईने या यशामागील कठोर मेहनत उघड केली. स्पर्धेपूर्वी आवश्यक वजनमर्यादा कायम ठेवण्यासाठी तिने दोन ते तीन दिवस अन्न आणि पाण्याचे सेवन जवळपास टाळल्याचे सांगितले. या त्यागामुळेच स्पर्धेत सर्वोत्तम कामगिरी करता आली, असे तिने नमूद केले. तिच्या या वक्तव्यामुळे एका खेळाडूला यशासाठी किती कठोर शिस्त आणि त्याग करावा लागतो, याची पुन्हा जाणीव झाली.
कुटुंब आणि प्रशिक्षकांना दिले यशाचे श्रेय
विजयानंतर मीराबाई चानूने आपल्या यशाचे श्रेय कुटुंबीय, प्रशिक्षक आणि संपूर्ण सहाय्यक संघाला दिले. अनेक दुखापतींवर मात करून पुन्हा सर्वोच्च स्तरावर पोहोचण्यासाठी कुटुंबाच्या पाठिंब्याने मोठी भूमिका बजावल्याचे तिने सांगितले.
ठळक मुद्दे
- ग्लासगो कॉमनवेल्थ गेम्स 2026 मध्ये महिला 48 किलो गटात सुवर्णपदक.
- भारताचे स्पर्धेतील पहिले सुवर्णपदक.
- सलग तिसरे कॉमनवेल्थ गेम्स सुवर्णपदक (Golden Hat-trick).
- (Commonwealth Games 2026) कॉमनवेल्थ गेम्समधील एकूण चौथे पदक.
- स्नॅच 85 किलो, क्लीन अँड जर्क 105 किलो, एकूण 190 किलो – विक्रमी कामगिरी.
- पंतप्रधान नरेंद्र मोदींसह देशभरातून अभिनंदनाचा वर्षाव.
समाज माध्यमावरील पंतप्रधान नरेंद्र मोदी यांची प्रतिक्रिया पाहण्यासाठी येथे क्लिक करा.
आमचे अन्य ब्लॉगपोस्ट :
